މިދަތުރު

އާދެ އިންތިޙާބީ މިދަތުރު އަޅުގަނޑު ފަށާފައިވަނީ 2004 ވަނަ އަހަރުގެ އާއްމު އިންތިޙާބުގައި ރައްޔިތުންގެ މަޖިލީހުގެ ނ. އަތޮޅުގެ ގޮނޑިއަށް ކުރިމަތިލައިގެންނެވެ. އެފަހަރު ދަތުރުކޮށް އަތޮޅުގެ މީހުން ދިރިއުޅޭ ހުރިހާގެއަކަށް ދޮރުން ދޮރަށް ޒިޔާރަތްކޮށް ރައްޔިތުންނަށް ތައާރަފްވެ، ބައްދަލުކުރީމެވެ. ލިބުނު ތަރުހީބަކީ މިދާއިރާއަށް އަލަށް ތައާރަފްވި އަޅުގަނޑުގެ ހިތުގެ އަޑިން ޝުކުރުވެރިކަމާއެކު ފާހަގަކުރާކަމެކެވެ. އަދި އަތޮޅުގެ ރައްޔިތުންގެ ތަރައްޤީއާއި ކުރިއެރުމަށް ހުރިމައްސަލަތައް ދެނެގަތުމުގެ އިބުރަތްތެރި ދަރުސްތަކެއްލިބުނު ދަތުރަކަށްވެސް އެދަތުރުވެގެން ދިޔައެވެ. މި ލިބުނު ތަރުޙީބާއި އިބުރަތާއި އެކު ރައްޔިތުންގެ މަޖިލީހުގެ ނ. އަތޮޅުގެ މެމްބަަރަކަށް މިފަހަރު މަތް ﷲ ގެ ވާގިފުޅާއެކު މިކުރިމަތިލަނީ ތިޔަބޭފުޅުންގެ ތާއީދުލިބޭނޭކަމުގެ ފުރިހަމަ އުއްމީދާއެކުއެވެ.

އުއްމީދަކީ އަދި އަޒުމަކީ އަތޮޅުގެ ރައްޔިތުންގެ އިޖުތިމާއި ހަމަޖެހުމާއި ގުޅުމަށް އަސަރުކުރަމުންދާ އިތުރުވަމުންދާ ކުއްތައް މަދުކުރުމަށާއި މަސްތުވާތކެތީގެ ވަބާއިން މުޖުތަމަޢު ސަލާމަތް ކުރުމަށް ހަރުދަނާ ފިޔަވަޅުތަކެއް އެޅުމަށް މަޖިލީސް ތެރޭން މަސައްކަތް ކުރުމެވެ. މަޖިލީސްތެރޭން ކުރެވޭނެ މަސައްކަތެއްކަމުގަ ދެކެނީ މަސްތުވާތަކެތީގެ ފަރުވާގެ އިންތިޒާމް ހަރުދަނާކުރުމުގެ ޤާނޫނީ އޮނިގަނޑާއި ބަޖެޓު ލިބޭނޭ ގޮތްތައް ފަހިކުރުމެވެ. އަދި މަސްތުވާތަކެތި އެތެރެކޮށް ވިޔާފާރި ކުރާފަރާތްތަކަށް ޤާނޫނީ ހަރުކަށި އަދަބުކަނޑައެޅި ތަންފީޡު ކުރުމެވެ

މީގެ އިތުރުން ކުށުންނާއި މަސްތުވާތަކެތީގެ ވަބާއިން ދިވެހި ޅަޖީލު ސަލާމަތްކުރުމަށްޓަކައި އިސްލާމީ ރިވެތި އުސޫލުތަކާއި ސުލުކީމިންގަޑުތަކާއި އާދަކާދަޔާއި ތަރުބިއްޔަތު ދަރީން ކިބައިގަ އަށަގެންނެވުމަށްޓަކައި ސްކޫލު ސިސްޓަމުންތެރޭން އިންތިޒާމް ހަމަޖެއްސުމަށް މަސައްކަތްކުރުމާއި ޅަދަރީން ދީނަށް ލޯބިޖެއްސުމާއި އިސްލާމީ ރިވެތި އަޙްލާޤެއް ދަރީންނަށް ދިނުމުގެ އިންތިޒާމުތައް މުޖުތަމަޢުގެ އާއިލާތަކާޢި ސްކޫލުމަދަރުސާތަކާއި މިސްކިތްތަކުގެ އިމާމުން ގުޅިގެން ހިންގުމަށް މަސައްކަތްކުރެވިއްޖެނަމަ އިޙްތިރާމާއި ގަދަރު އުފުލިގެންވާ މުޖުތަމަޢުއެއް ހުރިހާ އެންމެންވެގެން ބިނާކުރެވިދާނެކަމަށް ދެކެމެވެ.