ރައީސްކަންކުރެއްވި ފަރާތްތަކަށް ދެއްވާނެ ޕެންސަނާއި އިނާޔަތްތަކާއި ރައްކާތެރިކަމުގެ ވާހަކަ މިއަދު އެދަނީ ދައްކަމުންނެވެ. މިފަދަ އުސޫލެއް ރައީސްކަންކުރެއްވިފަރާތްތަކަށް ދުނިޔޭގެ ޤަޢުމުތަކުގައި ހަމަޖެހިފައިވެއެވެ. ނަމަވެސް މިހާރު ރާއްޖޭގައި ހިނގަމުންދާ ބަހުސަކީ ފާއިތުވި ތިރީސް އަހަރުގައި ވެރިކަން ކުރެއްވި ރައީސުލް ޖުމްހޫރިއްޔާއަށް ދެއްވަންޖެހޭނޭ އިނާޔަތާއި ރައްކާތެރިކަމުގެ ބިލެވެ.
މިބިލުގައި ފާހަގަ ކުރައްވާފައިވަނީ އެފަދަ ފަރާތްތަކަށް ދޭނޭ ގަދަރާ އިއްޒަތާއި ފައިސާއާއި އިނާޔަތްތަކުގެ ވާހަކައެވެ. މިގޮތުންދޭނޭ ފައިސާގެ އިނާޔަތުގައި ރައީސަކަށް ލިބެމުންދިޔަމިންވަރުގެ ހަތްދިހަފަސް ހާސް ރުފިޔާގެ މުސާރައަކާއި އެއްފަދަ މިންވަރެއް ދިނުމާއި ހުންނާނޭ ތަނެއް ދިނުމާއި ދުނިޔޭގެ ކޮށްމެތާކުން ސިއްޙީ ފަރުވާ ލިބިގަތުމާއި ޗުއްޓީ ހޭދަކުރެއްވުން ފަދަ ކަންތައްތައް ހަމަޖެހިފައިވުމަށެވެ.
މިފަދަ ބޮޑު އިނާޔަތްތަކެއް ރައްޔިތުން ބިކަހާލުގައި ބައިތިއްބައިގެން އެފަދަ ފަރާތްތަކަކަށް ފައިސާއާއި އިނާޔަތްތައް ދިނުމަކީ ރައްޔިތުންނަށް ބަރުދާސްތުކުރެވިދާނޭކަމަަކަށް ނުވެދާނެއެވެ. ސަބަބަކީ ރައްޔިތުން މިއަދު މިވަނީ ގިނަގުނަ ކަންތައްތަކަކަށް ބޭނުންވެފައެވެ. އެފަދަ ބޮޑު މާލީ އިނާޔަތްތަކަކީ ރައްޔިތުން މިތިބަ ހާލުގައި ކުރުން އެކަށޭނަކަމަކަށްނުވެއެވެ. އަދި ސިޔާސީ ޕާރޓީއެއްގެ ވެރިޔަކަށް ހުންނެވި ފަރާތަކަށް އެމަސައްކަތްކުރުމަށް ދެވޭ މުސާރައެއްފަދައިން މިފަދަ އިނާޔަތްތައް ހަމަޖެއްސުމަކީ ކުރުން އެކަށޭނަކަމެއް ނޫނެވެ.
މިހުރިހާ ގޮތްތަކަކަށް ރިޔާއަތްކޮށްގެން މެނުވީ މިފަދަބިލެއް ފުރިހަމަކޮށްގެން ނުވާނެއެވެ. މިސާލަކަށް ރާއްޖޭގެ ހާލަތަށް ވިސްނާއިރު ވެރިކަން ކުރެއްވި ކޮށްމެ ފަރާތަކަށް ދިރިއުޅުމަށް ގެޔަކާއި އޮފީސް އިމާރާތެއް ދިނުން ފަދަކަންތައްތަކަކީ ރާއްޖޭގެ ބިމުގެ ދަތިކަމާއެކު ވެދާނޭ ކަމަކަށް ނުވެއެވެ. އަދި ހަޤީގަތަކީ ވެރިކަން ކުރަމުންދާފަދަ ފަރާތަކާއެއްވަރަށް އެފަދަފަރާތަކަށް އިނާޔަތްތައް ކަޑައެޅުމަކީ ރައްޔިތުންގެ ތަރައްޤީއާއި ކުރިއެރުމަށް ހޭދަކުރަންޖެހޭ ފައިސާ މަދުވެގެންދާނޭކަމެކެވެ.
ވީމާ، އެފަދަ ބޮޑުއިސްރާފެއް ރައްޔިތުންގެ ފައިސާއިން ވެރިކަން ކުރައްވާފައިވާ ފަރާތަކަށް ހޭދަކުރެއްވުމަކީ ކުރުން އެދެވޭކަމަކަށް ނުވާނެއެވެ. މީގެ ބަދަލުގައި އެފައިސާ ރައްޔިތުންގެ ހޭދައަށް ރައްޔިތުންގެ ތަޢުލީމާއި ސިއްޙީފަރުވާއާއި ކުނިނަންތާލުމާއި ފާޙާނާގެ ނިޒާމާއި ފަޅާއި އެހެނިހެން ވަސީލަތްތައް ޤާއިމް ކުރުމާއި އެފަދަ ވަސީލަތްތަކުގެ ފެންވަރު ރަނގަޅުކުރުމަށް ހޭދަކުރުމީ ކޮށްމެހެން ކުރަންޖެހޭނޭ ކަމެކެވެ. އަޅުގަނޑުގެ އުއްމީދަކީ ރައްޔިތުން އެދޭގޮތަށް ރައްޔިތުން ފުރަތަމަ އިސްކޮށްގެން ރައްޔިތުންގެ ބޭނުންތަކަށް އިސްކަންދެވިގެން ކަންތައްތައް ރޭވިގެން ކުރިޔަށް ދިޔުމެވެ. މާތް ﷲ އަހަރުމެން އެންމެންނަށް ހެޔޮވިސްނުން ދެއްވާ ހެޔޮރަހްމަތް ލައްވާންދޭވެ.
2 comments:
which party are u running for??????
an independent up untill now.
Post a Comment