އަހުރަމެންގެ ހުރިހާ އުއްމީދެއް ގުޅިފައިވަނީ މިއަދުގެ ޅަދަރީންނާއެވެ. އެދަރީންނަކީ އަހުރަމެންގެ މުސްތަޤްބަލުގެ އުއްމީދެވެ. އެދަރީންނަށްދެވޭ އަޅާލުމާއި އިސްލާމީ ތަރުބިއްޔަތާއި ތަޢުލީމާއި ރައްކާތެރިކަމުގެ ސަބަބުން މެނުވީ އަހަރުމެންގެ މުސްތަޤްބަލު އުޖާލާކުރެވިގެންނުދާނެއެވެ. ވީމާ، އަހުރަމެންގެ ޒިންމާއަކަށް ވާނީ އެދަރީންނަށް ބޮޑުވުމަށް ފަހި، ދުޅަހެޔޮ، ރައްކާތެރި މާހަޢުލަކަށް މިމިޖުތަމަޢު ހެދުމެވެ.
މިގޮތުން ދަރީންނަށް ކުރާ ތަފާތު ގޯނާތަކުގެ ވާހަކައިން ގައިން ހީބިހި ނަގައިގެންދެއެވެ. ބައެއްފަހަރު ޅަދަރީން ވެގެން ދަނީ ޝިކާރަވެރިއެއްގެ ޝިކާރައަކަށެވެ. މުޖުތަމަޢުތެރޭ މަޑުމައިތިރިކަމާ އެކު ހިގާބިނގާވެ އުޅެނިކޮށް ނުވަތަ ކައިރީގައި ހުންނަ ފިހާރައަކަށް އެއްޗެއް ގަތުމަށް ދާ މަގުމަތީން އެދަރީންނަށް ތަފާތު ވައްތަރުގެ ގޯނާތައް މިދެއްނެވި ޝިކާރަވެރިންގެ ކިބައިން އަންނަމުންދެއެވެ. ވީމާ، އަޅުގަނޑުމެން ބެލެނިވެރިން، މައިން ބަފައިން، ބަލަދުވެރިން ވިސްނަންޖެހިފައިވަނީ އެދަރީންގެ ހިމާޔަތަށެވެ. އަދި އަހަރުމެން އެދަރީންނާއެކު މިވާ އެހެނިހެން ފަރާތްތަކުންވެސް އެދަރީންގެ ހިމާޔަތަށް އަތާއަތް ގުޅާލަންވާނެއެވެ.
ފަހުގެ ތާރީޙް ތަކުގައި ކުޑަކުދީންނަށް ގިނަގުނަ ގޯނާތަކެއް ކުރަމުންދާކަމުގެ ޙަބަރުތަކުން މިދީބުގެ ރައްޔިތުންގެ ހިތްނުތަނަވަސް ކުރުވައެވެ. ވީއިރު އަހަރުމެން ހުރިހާއެއްމެންވެސް އަހަރުމެންގެ ދަރީންގެ ރައްކާތެރިކަމަށް ވިސްނުންބަހައްޓައިގެން މަސައްކަތްކޮށް އެދަރީންގެ ލޮއީފް ނަފްސުތައް ރައްކާތެރިކޮށް ހިތްހަމަޖެހޭ އޯގާތެރި އަދި އަޅާލާ ރަނގަޅު ރައްކާތެރި މާހަޢުލެއް އުފެއްދުމާކީ އަޅުގަނޑުމެންގެ މިއަދުގެ ވާޖިބެކެވެ. ވީމާ، މިޒަމާނުގެ އޮއިވަރުގައި ނުޖެހި ދަރީންގެ ހިމާޔަތަށް ތެދުވާ ބަޔަކަށް އަހަރުމެން ވަމާތޯއެވެ.
މިފަދައިން ޅަދަރީންނަށް ގޯނާކުރާ ފަރާތްތަކަށް އަދަބުނުލިބި މުޖުތަމަޢުއަށް ދޫކޮށްލުމަކީ އިތުރު ބިރުވެރިކަމާއި ގޯނާ ހުއްޓުވުމުގެ ޒިންމާ އުފުލުމުގެ ބަދަލުގައި އެފަދަ ފުރުސަތުތަކަށް ފުރުސަތުދިނުން ފަދަކަމެކެވެ. ނަތީޖާއެއްގެ ގޮތުން އެފަދައިން ގޯނާލިބިފައިވާ ދަރީންނާއި އެދަރީންގެ އާއިލާތައް އިތުރުބިރުވެރިކަމާއި ނުރައްކަލުގެ ތެރެއަށް ހުށައެޅިގެންދެއެވެ. އެގޮތުން މިފަދަ ޝިކާރަވެރިން އެފަދަ ކުދީންނަށާއި އެކުދީންގެ އާޢިލާދިރިއުޅޭ ގެދޮރަށް ކަޅުތެޔޮޖަހާ އިތުރު ނަފްސާނީ ގެއްލުމާއި ބިރުވެރިކަން އެއާޢިލާއަށާއި މުޅި މުޖުތަމަޢުއަށް ދައްކަމުންދެއެވެ.
ވީމާ، އަޅުގަނޑުމެން ދަރީންނަށް ކުރާ ގޯނާ ހުއްޓުވުމަށް ޒިންމާވުމަކީ އެފަދަ ކަންކަމަށް ފުރުސަތު ނުލިބޭފަދަ ގޮތަކަށް ކަންތައްތައް ރޭވިގެން ހަމަޖެހިގެން އަޢުމެވެ. މިގޮތުން އަޅުގަނޑުމެންގެ ދަރީންގެ މުސްތަޤްބަލަށްޓަކައި އަންނަންއޮތް ޖީލުގެ ރައްކާތެރިކަމަށްޓަކައި ކުޑަކުދީންނަށް ގޯނާކޮށް ޝިކާރަކޮށް ހަދާފަރާތްތަކުގެ މައްސަލަތައް ތަޙުޤީގުން ސާބިތުވެ، ޝަރީއަތަށް ހުށައެޅިފައިވާއީރު އެފަދަ ކުއްވެރިން ރަށުތެރެއަށް ދޫކޮށް ނުލެވޭފަދަ ގޮތަކަށް ރާވާހަމަޖެއްސުމަކީ ޅަދަރީންނާއި އެދަރީންގެ އާޢިލާތަކަށް ލިބޭ ވަރަށް ބޮޑު ހިންހަމަޖެހުމަކަށް ވާނެއެވެ. އަދި ޒިންމާދާރުކަމާއި އެކު ކުޑަކުދީންނަށް ކުރާ ގޯނާ ހުއްޓުވުމަށް ކުރެވޭ މަސައްކަތަކަށްވެސް ވާނެއެވެ.
އަޅުގަނޑުގެ ދުޢާއަކީ އަޅުގަނޑުމެންގެ މިދީބުގެ ރަށްތަކަކީ އެރަށްތަކުގެ ރައްޔިތުންގެ މުސްތަޤްބަލުގެ އުއްމީދުތައް ރައްކާތެރިކޮށް، އެކަމަށް އަތާއަތްގުޅާލާބަޔަކަށް ވުމެވެ. އަދި އަހަރުމެން އެންމެންނަކީ ކުޑަކުދީންނަށް ކުރާގޯނާ ހުއްޓުވުމަށް ޒިންމާދާރުވުމަށް މަސައްކަތް ކުރާބަޔަކަށް ވުމެވެ.
No comments:
Post a Comment